Betrokkenheid wat ‘n verskil maak

Ons ouers is nie net teenwoordig nie – hulle is aktief deel van ons skoollewe. Van sportdae tot kultuuraande, fondsinsamelings tot akademiese ondersteuning – Louwtjie-ouers steek hul hand op, spring in, en wys hul kinders hoe ware gemeenskapsgees lyk.

Sport- en kultuurondersteuning

Of dit langs die krieketveld is, in die saal tydens ‘n revue, of agter die skerms by ‘n kunsuitstalling – ons ouers is lojale ondersteuners wat nie net hul eie kinders aanmoedig nie, maar elke Louwtjie. Hulle vorm ‘n netwerk van aanmoediging en trots wat ons leerlinge motiveer om hul beste te gee.

Akademiese ondersteuning

Ons ouers wys ook hul betrokkenheid waar dit dalk nie altyd sigbaar is nie: tydens eksamens en toetsreekse help hulle met akademiese akkommodasie vir kinders wat ekstra ondersteuning benodig. Dis hierdie stille gebare van omgee wat ‘n groot verskil maak in die lewens van ons leerders.

Dankie sê, die Louwtjie-manier

Elke graad het toegewyde klasverteenwoordigers wat help om kommunikasie te stroomlyn en onderwysers deur die jaar bederf met bederfies en verrassings. Op hul beurt leer hulle die kinders om waardering te wys – aan onderwysers, klasmaats en almal in ons skoolgemeenskap.

By Laerskool Louw Geldenhuys is ouers nie net gaste nie – hulle is deel van die storie. ’n Storie van omgee, ondersteuning en samewerking. Dankie dat jy ‘n Louwtjie-ouers is. Jy help ons om ‘n skool te wees waar kinders floreer, onderwysers geïnspireer bly, en ‘n gemeenskap saam groei.

Wil jy betrokke raak? Kontak jou kind se klasverteenwoordiger of stuur vir ons ‘n e-pos.
Saam is ons sterker!